७ लाख बढी भ्रष्टाचार गरेको भन्दै धनगढीका वन अधिकृत विरुद्ध मुद्दा दायर 

अत्तरिया: ७ लाख ३१ हजार रूपया भ्रष्टाचार गरेको भन्दै कैलालीको धनगढीका एक वन अधिकृत विरुद्ध मुद्दा दायर गरिएको छ । डिभिजन वन कार्यालय, धनगढीका वन अधिकृत पूर्णशंकर यादव विरुद्ध मुद्दा दायर गरिएको हो ।

अख्तियार दुरुपयोग अनुसन्धान आयोगले वरिष्ठ वन अधिकृति विरुद्ध भ्रष्टाचार मुद्दा दायर गरेको हो ।आयोगले सोमवार वरिष्ठ वन अधिकृत यादवविरुद्ध ७ लाख ३१ हजार बिगो कायम गरी विशेष अदालतमा आरोप–पत्र दायर गरेको छ ।

अख्तियारका प्रवक्ता राजेन्द्रकुमार पौडेलले वन अधिकृत यादवविरुद्ध भ्रष्टाचार मुद्दा दायर गरेको बताए । उनकाअनुसार वन अधिकृत यादवले कैलालीको चुरे गाउँपालिका–६ स्थित ग्वासी सामुदायिक वनको घाटगद्दी गरेको काठको छोडपूर्जीका लागि सेवाग्राहीसँग घुस माग गरेको भन्ने उजुरी परेको थियो ।

सोही उजुरीका आधारमा अनुसन्धान हुँदा वन अधिकृत यादवले सेवाग्राहीसँग ७ लाख ३१ हजार घुस लिएको पुष्टि भएपछि आरोपपत्र दायर गरेको अख्तियारका प्रवक्ता पौडेलले बताए ।

केही समयअघि यादवलाई सेवाग्राहीबाट ७ लाख ३१ हजार रुपैयाँ घुस लिएको अवस्थामा अख्तियारको टोलीले नियन्त्रणमा लिएको थियो । उनीमाथि ७ लाख ३१ हजार बिगो कायम गरी भ्रष्टाचार निवारण ऐन, २०५९ को दफा ३ को उपदफा ९१० बमोजिम कैद र सजायको माग गरिएको आरोप–पत्रमा उल्लेख छ ।