धनगढी: मंगलबार कैलालीका नयाँ प्रमुख जिल्ला अधिकारी कृष्णप्रसाद लम्सालले कैलाली कारागार घटनामा घाइते भएर अस्पतालमा रहेका कैदीबन्दीको व्यवस्थापनको विषयमा छलफल गरेका छन् ।
हालै मात्र सरुवा भएर आएका प्रमुख जिल्ला अधिकारी लम्सालले मंगलबार आयोजित पत्रकार भेटघाट कार्यक्रममा डिस्चार्ज भएका कैदीबन्दीको उचित व्यवस्थापन गरिने बताए । कारागारभित्र भएको हिंसात्मक घटनालाई उनले गम्भीर रूपमा लिएका छन् ।
कैलाली कारागारमा गत साउन २४ गते राति भएको हिंसात्मक घटनामा एक जना कैदीबन्दीको मृत्यु भएको छ भने ४८ जना घाइते भएका छन् । उपचारका लागि सेती प्रादेशिक अस्पताल भर्ना गरिएका ३९ जना कैदीबन्दी उपचारपछि डिस्चार्ज भएका छन् । तर उनीहरुलाई कारागार लगिएको छैन ।
डिस्चार्ज भएका कैदीबन्दीलाई सेती प्रादेशिक अस्पतालअन्तर्गत कोरोना अस्पताल भवनमा राखिएको छ । सेतीमा पाँच जना तथा काठमाडौँमा तीन जना कैदीबन्दीको उपचार भइरहेको प्रमुख जिल्ला अधिकारी लम्सालले बताए ।
उनीहरुमध्ये चार जनालाई कञ्चनपुर र एक जनालाई नवलपरासी स्थानान्तरण गरिएको छ । डिस्चार्ज भएका केही कैदीबन्दीले स्थानान्तरण र केहीले कैलाली कारागारमै रहने चाहना राखेको प्रशासनले जनाएको छ ।
प्रतिक्रिया दिनुहोस