अत्तरिया: कैलालीमा १० लाख बढी मूल्यको अवैध औषधिसहित दुई जना पक्राउ परेका छन् । जिल्लाको धनगढी उपमहानगरपालिका वडा नम्बर ७ मोतीचोकबाट अवैध औषधिसहित दुई जना पक्राउ परेका हुन् ।
हिजो सशस्त्र प्रहरी बल नेपाल नम्बर ३४ गण हेडक्वाटर कैलालीले १० लाख मूल्यभन्दा बढीको अवैध औषधिसहित दुई जनालाई नियन्त्रणमा लिएको हो ।
भारतबाट भन्सार छलेर १० लाख ६५ हजारभन्दा बढी मूल्यको औषधि र मोटरसाइकल सशस्त्र प्रहरी बलले नियन्त्रणमा लिएको छ । सशस्त्र प्रहरी बल नेपाल ३४ नम्बर गण हेडक्वाटर कैलालीबाट खटिएको नौ जनाको मोबाइल टोलीले दुई जनालाई अवैध औषधिसहित नियन्त्रणमा लिएको हाे ।
जिल्लाको कैलारी गाउँपालिका-५ पवेराका ३० वर्षीय मनोजकुमार चौधरी र गौरीगङ्गा नगरपालिका-१० उदासीपुरका २६ वर्षीय खेमराज चौधरी अवैध औषधसहित पक्राउ परेको सशस्त्र प्रहरी बल कैलालीले जनाएको छ । पक्राउ परेका व्यक्ति, अवैध औषधि र मोटरसाइकल आवश्यक कारबाहीका लागि भन्सार कार्यालय धनगढीको जिम्मा लगाइएको छ ।
प्रतिक्रिया दिनुहोस