अत्तरिया: भदौ २४ गते जेन-जी आन्दोलनका क्रममा कैलालीका तीनवटा नगरपालिकामा भएको क्षतिको प्रारम्भिक तथ्याङ्क सार्वजनिक भएको छ। जिल्लाको गोदावरी नगरपालिका, गौरीगंगा नगरपालिका र घोडाघोडी नगरपालिकामा भएको तोडफोड र आगजनीपछि भएको क्षतिको प्रारम्भिक विवरण सार्वजनिक गरिएको हो।
सुदूरपश्चिम प्रदेशका मुख्यमन्त्री कमलबहादुर शाहले आन्दोलनका क्रममा तोडफोड र आगजनी भएका तीनवटै नगरपालिकाको अनुगमन तथा निरिक्षण गरेका छन्।
आन्दोलनका क्रममा तोडफोड र आगजनी गरिएको गोदावरी नगरपालिकामा ९ करोड ५४ लाख २६ हजार ५ रुपैंया, गौरीगंगा नगरपालिकामा ७ करोड १२ लाख २३ हजार ५ सय रुपैंया र घोडाघोडी नगरपालिकामा ८ करोड ५० लाख २५ हजार ७२९ रुपैंया बराबरको क्षति भएको पाइएको छ।
अनुगमन तथा निरिक्षणका क्रममा मुख्यमन्त्री शाहले आन्दोलनबाट भौतिक संरचनामा भएको क्षतिबाट नआत्तिएर सबै एकजुट भई अगाडी बढ्नुपर्ने बताए। “विषम परिस्थितिमा पनि जनतालाई हामीले सेवा प्रवाह गर्नुपर्दछ,” मुख्यमन्त्री शाहले भने, “पालिकाहरुले सेवा प्रवाह गरिरहनुभएको छ, धन्यवाद।”
भौतिक संरचना निर्माण तथा प्रदेशलाई मितव्ययी बनाउन सुदूरपश्चिम प्रदेश सरकारले १० लाखभन्दा साना आयोजना कटौती तथा बैठक भत्ता, बिभिन्न किसिमका छपाई र सेमिनार गोष्ठिमा खर्च कटौती गरेको बताए। सुदूरपश्चिम सरकारले अन्य प्रदेशभन्दा अगाडी खर्च कटौती गरेको दाबीसमेत गरे।
यसैगरी मुख्यमन्त्री शाहले लम्कीचुहा–७ हरैयापुरमा अण्डा उत्पादन गरिरहेको एक पोल्ट्री फर्ममा पनि अनुगमन गरेका छन्। विद्युत आपूर्ति कम हुँदा उक्त पोल्ट्री फर्मका १२ हजार कुखुरा मरेका र जसबाट करौडको क्षति भएको पीडित दुर्गा बोहराले बताए।
प्रतिक्रिया दिनुहोस