धनगढीबाट काठमाडौँ जाँदै गरेको यात्रुबाहक बस कपिलवस्तुमा दुर्घटना, ३६ जना घाइते 

बुटवल: कैलालीको धनगढीबाट काठमाडौँतर्फ जाँदै गरेको यात्रुबाहक बस पूर्व पश्चिम राजमार्ग अन्तर्गत कपिलवस्तुको वनकसवासामा दुर्घटना भएको छ। दुर्घटनामा ३६ जना घाइते भएका छन्।

ना ८ ख ५७०३ नम्बरको बस आज बिहान सडक छेउमा पल्टिँदा दुर्घटना भएको हो। दुर्घटनामा परि २ जना गम्भीर घाइते भएको प्रहरीले जनाएको छ।

घाइतेमध्ये १५ जनालाई थप उपचारका लागि बुटवलस्थित प्रादेशिक अस्पतालमा रिफर गरिएको छ भने २० जनाको उपचार चन्द्रौटा–स्थित सञ्जीवनी सामुदायिक अस्पतालमा भइरहेको वडा प्रहरी कार्यालय चन्द्रौटाले जनाएको छ।