गेटा विश्वविद्यालयको रजिष्ट्रारका लागि यी हुन आवेदन दिने १० जना 

अत्तरिया: कैलालीको गेटामा शहीद दशरथ चन्द स्वास्थ्य विज्ञान विश्वविद्यालयको रजिष्ट्रारका लागि १० जनाको आवेदन परेको छ। शिक्षा, विज्ञान तथा प्रविधी मन्त्रालयकाअनुसार रजिष्ट्रारका लागि आवेदन परेकामध्ये १० जनाको नाम स्वीकृत भएको हो। ललितपुरका चन्द्रप्रकाश भट्ट, धनुषाका प्रमोदकुमार यादव, बझाङका डबलबहादुर धामी र कन्चनपुरका खेमराज जोशीको आवेदन स्वीकृत भएको छ।

यस्तै, कैलालीका शिवप्रसाद सापकोटा, कञ्चनपुरका डमरु पनेरु, बैतडीका गोविन्दसिंह विष्ट, बाराकी शिला मैनाली, बैतडीका भीमबहादुर चन्द र कैलालीका पदमराज जोशीको आवेदन स्वीकृत भएको छ।उपकुलपति र रजिष्ट्रार सिफारिस समितिले आवेदन परेकामध्येबाट प्रस्तुतीकरण अन्तर्वार्ताका आधारमा तीन जनाको सर्टलिष्ट गर्नेछ। तीन जना सर्टलिष्ट भएकाहरुलाई रजिष्ट्रार नियुक्तिका लागि प्रधानमन्त्री समक्ष सिफारिस गरिनेछ।

प्रधानमन्त्रीले सर्टलिष्टमध्येबाट एक जनालाई रजिष्ट्रार नियुक्त गर्नेछन्। १६ कात्तिकमा शहीद दशरथ चन्द विश्वविद्यालयको उपकुलपति र रजिष्ट्रारका लागि आवेदन माग गरिएको थियो। तर, उपकुलपतिका लागि पर्याप्त आवेदन नपरेपछि ५ मंसिरसम्म म्याद थपिएको छ।