अत्तरियाः सुदूरपश्चिममा मतदाताको संख्या बढेको छ। फागुन २१ गते हुने प्रतिनिधि सभा निर्वाचनका लागि यहाँका नौवटै जिल्लामा गरी १७ लाख १५ हजार ४३१ जनाले मतदाता नामावलीमा नाम दर्ता गरेको अभिलेख छ। ४६ हजार २० जना नयाँ मतदाताले आफ्नो नाम मतदाता नामावलीमा दर्ता गरेको पाइएको छ।
नयाँ मध्ये अनलाइनबाट २९ हजार ४३९ र निर्वाचन कार्यालयमै उपस्थित भएर १६ हजार ५८१ जनाले मतदाता नामावलीमा नाम दर्ता गराएका हुन्। प्रदेश निर्वाचन कार्यालयका अनुसार कैलाली, कञ्चनपुर र बैतडीमा अन्य जिल्लाको तुलनामा बढी मतदाता थपिएका छन्।
कैलालीमा १८ हजार २१३, कञ्चनपुरका १२ हजार २९१, बैतडीमा २ हजार ६५२ र दार्चुलामा २ हजार ६२८ नयाँ मतदाता थपिएका छन्। यस्तै, डडेलधुरामा एक हजार ८९२, बझाङमा २ हजार ३४५, अछाममा २ हजार ६०४, डोटीमा एक हजार ८७८ र बाजुरामा एक हजार ५१७ गरी जम्मा ४६ हजार २० नयाँ मतदाता थपिएको प्रदेश निर्वाचन कार्यालय प्रमुख प्रेमराज भट्टले बताए।
यो सँगै सुदूरपश्चिम कुल मतदाता संख्या १७ लाख १५ हजार ४३१ पुगेको छ। २०७९ को निर्वाचनमा प्रदेशमा मतदाताको सङ्ख्या १६ लाख ६९ हजार ४११ थियो। नयाँ दर्ता भएका मध्ये युवा उमेर समूहको सङ्ख्या धेरै रहेको कार्यालय प्रमुख भट्टले बताए। उनकाअनुसार अहिले निर्वाचन कार्यालयहरुमा संकलित नामावली रुजु गर्ने कामसँगै निर्वाचनको तयारी पनि बढाइएको छ।
प्रतिक्रिया दिनुहोस