सुदूरपश्चिम रोयल्सले दोस्रो संस्करणको सिद्धार्थ बैंक नेपाल प्रिमियर लिग (एनपिएल)को दशौं खेलमा कर्णाली याक्सलाई १४० रनको लक्ष्य दिएको छ।
सोमबार कीर्तिपुरस्थित त्रिवि क्रिकेट मैदानमा टस हारेर ब्याटिङ गरेको सुदूरपश्चिमले निर्धारित २० ओभरमा ९ विकेट गुमाउँदै १३९ रन बनाएको हो।
सुदूरको इनिङ्समा कप्तान तथा मार्की दिपेन्द्र सिंह ऐरीले सर्वाधिक ३९ रन बनाए। २८ बलमा एक चौका र दुई छक्का हिर्काएका दीपेन्द्रलाई मार्क वाटले नाजिवुल्लाह जाद्रनबाट क्याच गराएका हुन्। हर्मित सिंहले १७ बलमा १९ रन बनाए। समान एक चौका र छक्का हिर्काएर दीपेन्द्रलाई राम्रो साथ दिइरहेका अमेरिकी अलराउन्डरलाई कप्तान सोमपाल कामीले बोल्ड गरे।
दीपेन्द्र र हर्मितले छैटौं विकेटको लागि २८ बलमा सर्वाधिक ४८ रनको ठूलो साझेदारी गरेका थिए। १२.१ ओभरमा ७३ रन बनाउँदा आरिफ शेख आउट भएपछि दुई खेलाडीबीच यो साझेदारी बनेको थियो।
आसिफ शेखले २५ बलमा तीन चौकासहित २७ रनको योगदान गरे। उनलाई नन्दन यादवले बोल्ड गरेका थिए। दीपेन्द्र र आरिफले पाँचौ विकेटको रुपमा २२ बलमा २७ रनको साझेदारी गरे।
८.३ ओभरमा मात्र ४६ रन जोड्दा ४ विकेट गुमाएपछि सुदूरपश्चिम दबाबमा आएको थियो। कप्तान सोमपालले जस ब्राउनलाई रोयल डक गरेपछि कर्णाली सुरुबाटै हौसियो। सुदूरले ११ रन बनाएका अर्का ओपनर विनोद भण्डारीलाई दोस्रो विकेटको रुपमा गुमायो। यतिबेला सुदूरले जम्मा २३ रन खातामा जोडेको थियो। बिनोदलाई युवा स्पिनर विपिन शर्माले एलबिडब्लु धरापमा पारे।
२० बलमा दुई चौकासहित १८ रन बनाएका क्रिस लिनलाई युवराज खत्रीले विलियम बोसिस्टोबाट क्याच आउट गराएका हुन्। ७.३ ओभरमा तेस्रो विकेट गुमाउँदा सुदूरले मात्र ३९ रन जोडेको थियो। २ रन मात्रै जोडेका इशान पाण्डेलाई नन्दन यादव र बोसिस्टोले रनआउट गराए। जति बेला सुदूरले मात्र ४६ रन जोडेको थियो। सोमपालले पहिलो बलमै नरेन साउदलाई डक गराए।
कर्णालीका लागि कप्तान सोमपालले सर्वाधिक तीन विकेट लिए। उनले चार ओभरमा एक मेडनसहित ३२ रन खर्चिए। नन्दन यादवले तीन ओभरमा मात्र ११ रन दिएर दुई विकेट लिए। विपिन शर्मा, मार्क वाट र युवराज खत्रीले समान एक विकेट लिए। समान एक ओभर बलिङ गरेका विलियम र पवन सरार्फ भने विकेटविहिन रहे।
आजै भएको पहिलो खेलमा जनकपुर बोल्ट्सलाई ९ रनले हराउँदै विराटनगर किंग्सले लगातार तेस्रो जित निकालेको छ। - नयाँ पत्रिकाबाट
प्रतिक्रिया दिनुहोस