बैतडी: कैलालीको धनगढीबाट छुटेको जीप बैतडीमा दुर्घटना हुँदा दुई जनाको मृत्यु भएको छ । धनगढीबाट दार्चुलाको गन्नातर्फ जाँदै गरेको सुप प्र ०४ ००१ ज १३७२ नम्बरको जीप दुर्घटना हुँदा दुई जनाको मृत्यु भएको हो ।
डिलासैनी गाउँपालिका–१ का चालकसमेत रहेका २४ वर्षीय सन्तोषबहादुर राना र सोही ठाउँका ३२ वर्षीय किरण बोहराको मृत्यु भएको जिल्ला प्रहरी कार्यालय बैतडीका प्रहरी निरीक्षक बलराम पाण्डेयले बताए ।
जीपमा सवार अन्य ६ जना घाइते भएका छन् । डिलासैनी–१ का ४५ वर्षीय रामकुमार राना, २१ वर्षीया भागरती खत्री उनकी २ वर्षकी छोरी एलिसा, २१ वर्षका हेमन्तप्रसाद भट्ट, २७ वर्षीय राजेन्द्रबहादुर खत्री र ५१ वर्षीया कलमा धामी घाइते भएको प्रहरी निरीक्षक पाण्डेयले बताए ।
राजेन्द्र र कलमालाई थप उपचारका लागि धनगढी रिफर गरिएको जिल्ला प्रहरी कार्यालय बैतडीले जनाएको छ । शनिवार बिहान करिब साढे ५ बजेको समयमा पाटन नगरपालिका–६ मा जीप दुर्घटना भएको हो ।
दुर्घटनापछि इलाका प्रहरी कार्यालय पाटनको टोली र स्थानीय उद्दारमा खटिएका थिए । जीप सडकबाट करिब १०० मिटर तल भिरमा थामिएको हो । दुर्घटनाको कारण भने खुलेको छैन ।
प्रतिक्रिया दिनुहोस