अत्तरियाः कैलालीमा एक जना शिक्षकको रहस्यमय मृत्यु भएपछि विद्यार्थीहरुको रुवाबासी चलेको छ ।
जिल्लाको जानकी गाउँपालिका–४ को जनता नमुना माध्यमिक विद्यालयमा कार्यरत ४५ वर्षीय शिक्षक जगदीश पन्तको शङ्कास्पद मृत्यु भएपछि विद्यार्थीको रुवाबासी चलेको हो ।
घटना शंकास्पद भएपछि विद्यार्थी, शिक्षक र स्थानीयले इलाका प्रहरी कार्यालय टीकापुर घेराउ गर्दै घटनाको सत्यतथ्य तत्कार बाहिर ल्याएर दोषीलाई हदैसम्मको कारबाही हुनुपर्ने माग गरेका छन् ।
आइतबार ठुलो संख्यामा विद्यार्थी, शिक्षक–शिक्षिका र स्थानीय इलाका प्रहरी कार्यालय टीकापुर घेराउ गर्न पुगेका थिए । घटनापछि भने प्रहरीले अनुसन्धानका लागि नियन्त्रणमा लिएको छ । नियन्त्रणमा लिएकाहरुको नाम भने सार्वजनिक गरिएको छैन ।
पेय पदार्थमा विषादी मिसाएको र सो पेय पदार्थ पन्तले सेवन गर्दा उनको मृत्यु भएको आशङ्का गरिएको छ ।घटनाबारे बुझ्न तीन जनालाई नियन्त्रणमा लिएर अनुसन्धान अगाडि बढाइएको इलाका प्रहरी कार्यालय टीकापुरका प्रमुख प्रहरी नायव उपरीक्षक नवीनराजा बुढाथोकीले जानकारी दिए ।
शिक्षक पन्त विगत १७ वर्षदेखि विद्यालयमा अङ्ग्रेजी विषय अध्यापन गराउँदै आएका थिए । बिदामा घर गएका शिक्षक पन्त साउन ३ गते धनगढीबाट फर्केका थिए । उनीसँग अर्का एक जना शिक्षक समेत फर्केका थिए ।
उनीहरू दुबै जना दुगौलीमा अलग–अलग घरमा डेरा गरी बस्ने गरेको विद्यालयले जनाएको छ । दुबैजना शिक्षक आ–आफ्नो डेरामा गएको केही समयपछि मृतक पन्तले ती अर्का शिक्षकलाई फोन गरेर टीकापुर बोलाएका थिए ।
उनी टीकापुर पुग्दा पन्त एक होटलमा छटपटाइ रहेको अवस्थामा फेला परेका थिए । उनीहरूले पन्तलाई उपचारका लागि टीकापुर अस्पताल लगेका थिए । तर चिकित्सकले पन्तलाई मृत घोषणा गरेका हुन् ।
त्यसपछि घटना शंकास्पद भएको भन्दै सत्यतथ्य पत्ता लगाएर दोषीलाई कारबाहीको दायरामा ल्याउन आफन्तले माग गरेका छन् ।
प्रतिक्रिया दिनुहोस